அரசினர் மேல்நிலை பள்ளி – மாணவர்கள் சேர்க்கையில் மெத்தனம்

தாமரன்கோட்டை அரசினர் மேல்நிலை பள்ளியில் இக்கல்வியாண்டின் (2016-2017) பத்தாம் வகுப்பு சேர்க்கைக்காக மாணவர்கள் மற்றும் பெற்றோரும் (29-05-2016) தேதி முதல் இன்று வரை பள்ளிக்கு வந்த வண்ணம் உள்ளனர். ஆனால் அப்பள்ளியின் தலைமை ஆசிரியர் திங்கள் வா , புதன் வா என்று மாற்றி மாற்றி கூறி மாணவர்கள் சேர்க்கையில் மெத்தனம் காட்டுகிறார்.மேலும் பள்ளியில் சேர்பதற்கு நாற்காலி,மேசை,மின்விசிறி போன்ற பொருட்கள் வாங்கி கேட்பதாக கூறப்படுகிறது. பொறுப்புள்ள பதவியில் இருக்கும் இவரின் அலட்சிய போக்கால் 10 க்கும் மேற்பட்ட மாணவர்கள் பள்ளி சேர்க்கைக்கா இன்று வரை காத்திருக்கிறார்கள் . (more…)

Like and Share

தாமரன்கோட்டையில் நடைபெற்ற உழவர் மன்ற தொடக்க விழாவை பற்றிய தினகரன் செய்தி

தாமரன்கோட்டையில் உழவர் மன்ற தொடக்க விழா நடைபெற்றது. அதைப்பற்றி தினகரன் நாளிதழ் வெளியிட்டிருந்த செய்தி.

தாமரன்கோட்டை - தினகரன் செய்தி

தனிமனிதன் சாதிக்க முடியாததை குழுவாக செயல்பட்டால் சாதிக்கலாம்

நபார்டு வங்கி அதிகாரி பேச்சு

பட்டுக்கோட்டை, அக் 14;
தனிமனிதன் சாதிக்க முடியாததை குழுவாக செயல்பட்டால் நிச்சயம் சாதிக்கலாம் என்று நபார்டு வங்கி துணைப்பொது மேலாளர் பேசினார்.

பட்டுக்கோட்டையை அடுத்த தாமரங்கோட்டையில் தேசிய விவசாய மற்றும் ஊரக வளர்ச்சி வங்கி(நபார்டு), சிட்டியூனியன் வங்கி இணைந்து நடத்திய உழவர் மன்ற துவக்க விழா நடைபெற்றது. தாமரங்கோட்டை வடக்கு ஊராட்சித் தலைவர் சுபத்ரா ராஜேந்திரன் தலைமை வகித்தார். ஒன்றியக்குழு உறுப்பினர் ஆச்சிக்கண்ணு நடராஜன் முன்னிலை வகித்தார். உழவர் மன்றத்தின் தலைவர் ராமமூர்த்தி வரவேற்றார். துவக்க விழாவில் தஞ்சை நபார்டு வங்கியின் துணைப் பொது மேலாளர் ரவிக்குமார் கலந்து கொண்டு திட்டங்கள் மற்றும் மன்றத்தின் செயல்பாடுகள் குறித்து பேசுகையில், தனிமனிதன் சாதிக்க முடியாததை குழுவாக செயல்பட்டால் நிச்சயம் சாதிக்கமுடியும். இந்த மன்றம் வங்கிகளையும், தனி மனிதரையும் இணைக்கும் பாலமாக அமையும் என்றார்.

சிட்டியூனியன் வங்கி நுண்கடன் பிரிவு முதன்மை மேலாளர் சேகர், தஞ்சாவூர் தமிழ்நாடு கால்நடை மற்றும் அறிவியல் பல்கலைக்கழக ஆராய்ச்சி நிலைய தலைவர் புண்ணிய மூர்த்தி, வேப்பங்குளம் தென்னை ஆராய்ச்சி நிலைய தலைவர் நடராஜன், பட்டுக்கோட்டை வேளான்மை உதவி இயக்குநர் செல்வபாண்டி, தோட்டக்கலைத்துறை உதவி இயக்குநர் சந்திரகாசன், தாமரங்கோட்டை சிட்டியூனியன் வங்கி மேலாளர் சுபாஷ் சந்தர், வேளன்மை அலுவலர் மாலதி, தோட்டக்கலை அலுவலர் மாலதி, தோட்டக்கலை அலுவலர் யுகானந்தம் பேசினர். உழவர் மன்ற செயலாளர் பாலகிருஷ்ண மூர்த்தி நன்றி கூறினார்.

Like and Share

கல்விக் கடனுதவி தொடர்பாக சில கோரிக்கைகள்

என் பெயர் செந்தில் குமார், நான் பொறியியல் மூன்றாம் ஆண்டு படித்து வருகிறேன், என்னுடைய கருத்துக்களை பகிர்ந்துகொள்ள வாய்ப்பளித்த தாமரன்கோட்டை இணையதளத்திற்கு மிகுந்த நன்றி.

தாமரன்கோட்டை மற்றும் அதனை சுற்றியுள்ள ஊர்களில் உள்ள மாணவர்களுக்கு முழுமையான கல்விக்கடன் கிடைப்பது சிரமமாக உள்ளது. தாமரன்கோட்டையில் உள்ள சிட்டி யூனியன் வங்கியில் கல்விக் கடன் வழங்க பல கட்டுப்பாடுகளை விதிக்கிறார்கள். அப்படியே தரும் பட்சத்தில் முழுமையான கட்டணத்திற்கு கடன் தருவதில்லை. சிலருக்கு 50% கட்டணமே கடனாகத்தரப்படுகிறது. மேலும் வட்டி விகிதமும் மிக அதிகமாக இருக்கிறது. பட்டுகோட்டையில் உள்ள அரசு வங்கிகளில் கடனுதவி கோரினால், தாமரன்கோட்டையில் உள்ள சிட்டி யூனியன் வங்கியை அணுகும்படிக் கூறி கை விரித்து விடுகிறார்கள்.

கல்விக்கட்டணம் பல ஆயிரங்களாக இருக்கும் நிலையில் முழுமையான கடனுதவி இல்லாமல் மாணவர்கள் மேற்கல்வி பயில்வதற்கு மிகவும் சிரமப்படுகிறார்கள். பலர் கந்து வட்டிக்கு பணம் வாங்கி படிக்கும் நிலைமை ஏற்படுகிறது. இதனால் சில நேரங்களில் அவர்களின் உயர் கல்வி தடைபட்டும் போகிறது. இந்நிலை மாற வேண்டும். தாமரன்கோட்டை மற்றும் அதனைச் சுற்றியுள்ள ஊர்களில் உள்ள மாணவர்களுக்கு, பட்டுக்கோட்டை அரசு வங்கிகளில் கல்விக் கடன் வழங்க வேண்டும். இல்லையெனில் ஒரு அரசு வங்கியாவது தாமரன்கோட்டையில் அமைக்கப்பட வேண்டும். இது போன்ற மாற்றங்கள் தாமாக நிகழப்போவது இல்லை. மக்கள் ஒன்றிணைந்து ஒரு குரலில் கோரிக்கை வைத்து, எல்லா வழிகளிலும் முயன்றால்தான் நிகழும்.

பெற்றோர்களும், மாணவர்களும், வெளிநாடுகளில் வசிப்போரும், அரசியலில் செல்வாக்குள்ளவர்களும், உயர் பதவிகளில் இருப்பவர்களும் இந்த விசயத்தில் ஒத்துழைத்து என் போன்ற மாணவர்களுக்கு அரசு வங்கிகளில் குறைந்த வட்டியில் கல்விக்கடன் கிடைக்க வழி செய்தால் பேருதவியாக இருக்கும். இது தொடர்பாக உங்கள் கருத்துக்களை பகிர்ந்துகொள்ளுங்கள்.

Like and Share

NRR ஐ எதிர்த்து சுயேட்சை வேட்பாளர் நிறுத்த முயற்சி?

மூன்றாவது முறையாக காங்கிரசு சார்பில் போட்டியிடப் போகும் தற்போதைய உறுப்பினர் ரெங்கராஜனை எதிர்த்து சுயேட்சை வேட்பாளரை நிறுத்த முயற்சி நடப்பதாகத் தெரிகிறது. பட்டுக்கோட்டை தொகுதி தொடர்ந்து காங்கிரசுக்கு செல்வதால் சில திமுகவினர் அதிருப்தியில் உள்ளனர். மேலும் உறுப்பினராக தொகுதி மக்களுக்கு ரெங்கராஜன் அவர்கள் ஆற்றிய பணியிலும் பலர் குறைபாடுகள் தெரிவிக்கின்றனர்.

தொடர்ந்து இரண்டு முறை உறுப்பினராக இருந்தவர்களுக்க வாய்ப்பு இல்லை என்று வந்த தகவல்களைத் தொடர்ந்து, வேறு யாருக்காவது தொகுதி ஒதுக்கப்படும் என எதிர்பார்க்கப்பட்டது. ஆனால் ரெங்கராஜன் தனது செல்வாக்கைப் பயன்படுத்தி வேட்பாளராக இடம் பெற்றுக்கொண்டார். இதன் காரணமாக ரெங்கராஜனை எதிர்த்து சமுதாய பின்புலம் உள்ள சுயேட்சை வேட்பாளரை நிறுத்த முயற்சிகள் நடைபெற்று வருகின்றன.

சுயேட்சை வேட்பாளரால் வெற்றி பெற இயலாவிட்டாலும், அதிருப்தி வாக்குகளை பிரிப்பதன் மூலம், ரெங்கராஜனது வெற்றி வாய்ப்பு பாதிக்கப்படலாம்.

Like and Share

உள்ளுரில் வேலை-வாய்ப்புகள் -விவாதக்கட்டுரை

தாமரன்கோட்டைஇணைய நண்பர்களுக்கு வணக்கம்!

உள்ளூரில் வேலை வாய்ப்புகள் இல்லாது இருப்பதையும் ,அதை உருவாக்குவது பற்றியும் ஒரு விவாத கட்டுரை தொடங்க வேண்டுமென்ற தனது  எண்ணத்தை நமது  இணைய  ஆசிரியர் வெளிப்படுத்தி இருந்தார் .அந்த வகையில் இந்த கட்டுரையில் சில எண்ணங்களையும், கேள்விகளையும் பகிர்ந்து கொள்ளலாம் என்ற எண்ணத்தில் இந்த கட்டுரை வெளியிடபடுகின்றது .

முதலில் விவசாயத்தை அடிப்படையாக கொண்ட கிராமங்களில் எந்தமாதிரியான தொழில் தொடங்குவது அல்லது வேலை வாய்ப்புக்களை உருவாக்குவது  என்று விவாதம் செய்வது சற்று கடினமான விடயம். பட்டுக்கோட்டை  போன்ற சிறு நகரங்களில்  கூட நாம் பெரிய அளவிலான வேலை வாய்ப்புக்களை எதிர்பார்க்க முடியாது என்பது தான் உண்மை. மாறாக நமது ஊர் இளைஞர்கள் ஏன் அதிக அளவில் வெளி நாடுகளுக்கு வேலைக்கு செல்கிறார்கள் என்றால் அவர்களுக்கு கிடைக்க கூடிய வருமானம் ஒரு முக்கிய காரணி என்று சொல்லலாம்.

படிக்காமல் வெளிநாடுகளுக்குசெல்பவர்களைவிட படித்தவர்கள் வெளி நாடுகளுக்கு செல்வதால் அவர்களுடைய திறமை எதோ ஒரு வகையில் நமது நாட்டுக்கு இழப்பை ஏற்படுத்துகிறது .அதே சமயம் நாம்மற்றொன்றையும் கவனத்தில் கொள்ள வேண்டும் .அவர்களுடைய திறமையை நமது நாடு பயன்படுத்திக்கொள்ள தயாராக உள்ளதா என்பதுதான்  அது? என்னை கேட்டால் இல்லை என்று தான் சொல்வேன். அரசியல் என்பது ஒரு கல்லை சிலையாக செதுக்ககூடிய உளி போன்றது. அது எந்நேரமும் கூர்மையாகவும்,அதை செதுக்குபவனுக்கு கல்லில் தேவைஇல்லாத பகுதி எது என்று தெரிந்திருக்க வேண்டும், அப்பொழுதுதான் சிலை அவன் நினைத்தபடி வரும். ஆனால் நமது நாட்டில் அது முனை மழுங்கி,குரங்குகள் கையில் கிடைத்த பூமாலை ஆகிவிட்டது என்பது தான் உண்மை. எதை தொட்டாலும் லஞ்சம், அரசியல்வாதிகளின் குறிக்கீடு என எதையுமே சரியாக செய்ய முடியாத நிலைமைதான்.

இவற்றை எல்லாம் விவாதிப்பதை விட்டு விட்டு ஆக்கபூர்வமாக நமதுஊரின் வளர்ச்சிக்கு என்ன செய்யலாம் என்று சிந்திக்கலாம்.

முதலில் நமது ஊரின் பள்ளிகளில் இருந்து தொடங்க வேண்டும். பள்ளிகளின் செயல்பாடுகளையும், அங்கு படிக்கும் மாணவர்களின் முன்னேற்றத்தையும்  யார் கண்காணிக்கிறார்கள்? அதற்கென்று தனியாக ஏதும் குழு  அல்லது அமைப்பு இருக்கிறதா ?

பெற்றோர் -ஆசிரியர் கழகம் என்று ஒன்று இருக்கிறது, அதன் செயல்பாடுகள் என்ன? மாணவர்களின் கல்வி முன்னேற்றத்திற்கு  அந்த கழகம் எந்த வகையில் உதவுகிறது? இதெற்கெல்லாம் விடை தெரிய வேண்டிய நிலையில் நாம் இருக்கின்றோம். தெரிந்தவர்கள் பகிர்ந்து  கொள்ளலாம்,அவை உண்மையாக இருக்கும் பட்சத்தில்! பள்ளிகள்தான் மாணவர்களுக்கு அடையாளத்தை தரவேண்டுமே ஒழிய, மாணவர்கள் பள்ளிகளுக்கு தரக்கூடாது. அப்பொழுதான் பள்ளியின் தரம் நிர்ணயிக்கபடுகிறது. அதுமட்டுமல்லாமல் மக்கள் பிரதிநிதிகள் எந்த வகையில் கல்வியின் முன்னேற்றத்திற்கு தங்கள் பங்கை செலுத்துகிறார்கள் என்று நாம் தெரிந்து கொள்ள வேண்டும். சாலைகள் போடுவதும், குளங்கள் தூர் வாருவது மட்டும் ஒரு ஊரின் முன்னேற்றத்திற்கு வழிவகுத்துவிடாது. அதுவும் ஒரு வழி அவ்வளவுதான். அரசியல்வாதிகள் ஒரு எதிர் கால திட்டத்தை முன்னெடுக்கவேண்டும். அப்பொழுதுதான் உலகத்தின் வளர்ச்சி வேகத்தோடு நாம் போட்டி போட முடியும்.

தனி நபர் ஊக்குவிப்பு என்பது நமது ஊரில் எந்த அளவில் இருக்கிறது என்று தெரியவில்லை. எனக்கு தெரிந்தவரை நமது ஊரை சேர்ந்த அ.மணிகண்டன் சில பாடங்களில் முதல் மதிப்பெண்  எடுக்கும் மாணவர்களுக்கு பரிசுகள் வழங்கி வந்தார். அதை பற்றியமுழு விபரம் எமக்கு தெரியவில்லை. யாருக்காவது தெரிந்திருந்தால் பகிர்ந்து கொள்ளலாம். தேவை பட்டால்  முழு விபரம் கிடைக்க முயற்சி எடுப்போம்.

மாணவர்களும் ஆசிரியர்களின் திறமைகளை சரியாக பயன்படுத்திக்கொள்ள வேண்டும். நமது ஊர் தலைமை ஆசிரியர் வேதியலில் சிறந்தவர். ஆனால் எத்துனைபேர் அந்த பாடத்தில் சிறந்து விளங்குகிறார்கள் என்று தெரியவில்லை. நமது தேவையை நிறைவு செய்ய நாம் தான் அதற்கான வழியை தேடி ஓட வேண்டும். அதேபோல் ஆசிரியர்களும் மாணவர்களை தங்களுடைய தேவைகளுக்கு பயன்படுத்துவதை நிறுத்த வேண்டும். எனக்கு தெரிந்து நமது கீழக்காடு தொடக்க பள்ளியில் ஆசிரியர்களுக்கு பூ, சீப்பு போன்ற பொருள் வாங்குவதெற்கு மாணவர்கள் வருவார்கள். பார்ப்பதற்கு இது சிறு விடயமாக தெரியலாம்  ஆனால் இது ஒரு தவறான உதாரணமாகிவிடும் .தற்போதைய நிலை தெரியவில்லை. இதை ஏன் பகிர்ந்து கொள்கிறேன் என்றால், அப்துல் கலாம் எதற்காக குழந்தைகளிடம் அதிக நேரத்தை செலவிடுகிறார் என்று பார்த்தால் அது ஒரு நெடுங்கால் திட்டம். எங்கே அடித்தால் எங்கே வலிக்கும் என்று அவருக்கு தெரியும். வளர்ச்சியை சிறுவர்களிடம் தொடங்கினால்தான் எதிர்காலத்தில் அதில் நாட்டில் பிரதிபலிக்கும் என்ற அவரின் எண்ண ஓட்டம் தான் அது.

மேலும், தொழில் தொடங்குவது என்பது தனிப்பட்ட ஒருவரின் விருப்பம். ஆர்வலர்களை ஊக்குவிக்கலாம். ஆர்வத்தை உருவாக்குவது சற்றே கடினம்.நமது ஊரில் சிறந்த உதாரணம் “மாருதி எலக்ட்ரிகல்ஸ்”. யார் சென்று கேட்டாலும் வேலை உண்டு. அருமையாக நிர்வாகம் செய்துவருகிறார் திரு.பாலசுபிரமணியம் அவர்கள். நமது ஊர் விழாக்களில் தொழில் முனைவோர் பரிசு என்ற ஒன்றை உருவாக்கி அதை அவருக்கு வழங்கலாம். அதுபோல ஆர்வமுள்ளவர்கள் தொடங்கலாம். மருந்தியல் படித்துவிட்டு சில பேர் நமதுஊரில் இருக்கிறார்கள், அவர்களில் பெண்களும் இருக்கிறார்கள். ஆனால் நமது ஊரில் மருந்தகம் வைத்திருப்பது, பக்கத்துக்கு ஊரை சேர்ந்தவர் .

நிலைமை இப்படி போய்கொண்டு இருக்கிறது.இதை பற்றிய விவாதம் கண்டிப்பாக தேவைதான். நண்பர்கள் தங்களது கருத்துகளை பகிர்ந்து கொண்டால் அதன் அடிப்படையில் ஆக்கபூர்வமான சில நடவடிக்கைகளை முன்னெடுக்கலாம்.

நன்றி!

Like and Share

பறவைகளின் சங்கமம் வடுவூர் சரணாலயம்

ன்னார்குடி- தஞ்சாவூர் சாலையில் 14 கீமீ தொலைவில் உள்ளது வடுவூர் பறவைகள் சரணாலயம், புகழ்மிக்க வைணவத் தலமான கோதண்ட ராமர் கோயிலின் பின்புறம் சுமார் 300 ஏக்கர் பரப்பளவில் பரந்துவிரிந்த வடுவூர் ஏரியில் இந்தச் சரணாலயம் அமைந்துள்ளது.

கூட்ஸ், யூக்ரெட், பெலிகான் போன்ற வெளிநாட்டு அரிய பறவையினங்கள் இங்கு வந்து செல்வதாகக் குறிப்பிடுகின்றனர் பறவையியல் ஆராய்ச்சியாளர்கள். 1991-ம் ஆண்டு முதல் வடுவூர் ஏரி சரணாலயமாக அறிவிக்கப்பட்டு பராமரிக்கப்படுகிறது.

சின்ன வெள்ளைக் கொக்கு, உன்னி கொக்கு, மடையான், வாக்கா, பாம்புதாரா, நீர்காகம், ராமச்சிறவி, முக்குளிப்பான், சைபீரியாவைச் சேர்ந்த சிறவி, ஆஸ்திரேலியாவைச் சேர்ந்த நாமக்கோழி, மாலத்தீவைச் சேர்ந்த பெரிய வெள்ளைக் கொக்கு மற்றும் கூழக்கொடா, கரண்டி மூக்கன், வெள்ளை அரிவாள் மூக்கன், கொசு உள்ளான் போன்றவை இங்குள்ளன. இலங்கை, வங்கதேசம், மியான்மர், பாகிஸ்தான் போன்ற நாடுகளில் இருந்தும் பறவைகள் இங்கு வந்த தங்கிச் செல்கின்றன. நவம்பர் முதல் பிப்ரவரி வரையிலான காலத்தில் அதிக எண்ணிக்கையில் இங்கு வரும் பறவைகள் இனப்பெருக்கம் செய்கின்றன.

இயற்கை அழகை இனிதே ரசிப்பதுடன், பறவைகளின் சந்தோஷமான ஆர்ப்பரிக்கும் ஒசைகளுடன் இங்கு பொழுதைக் கழிப்பது தனி சுகம் என்கிறார் இதுகுறித்து ஆய்வுக்காட்டுரை தயாரித்து வரும் நாட்டுநலப் பணித்திட்ட அலுவலர் என். ராஜப்பா. இந்தச் சரணாலயத்துக்கு மேலும் பல வசதிகள் செய்து கொடுத்தால், ஆண்டு முழுவதுமே எராளமான பறவைகள் வந்து செல்வதற்கும் வாய்ப்பாக அமையும் என்றும் அவர் குறுப்பிடுகிறார். கோடைக்காலத்தில் வறண்ட திடலாகக் காட்சி தரும் இந்த ஏரியை- ஆண்டு முழுவதும் தண்ணிர் நிரம்பியிருக்கும் வகையில் மாற்றியமைத்து, படகு குழாம் அமைக்க வேண்டும் என்றும் இப்பகுதி மக்கள் விரும்புகின்றனர்.

பின் குறிப்பு: தினமணி புத்தாண்டு மலர் திருச்சி பதிப்பில் வந்த இந்த கட்டுரை இணையத்தில் எங்கும் கிடைக்கவில்லை. இதன் பயன் கருதி இங்கு மீள்பதிப்பு செய்யப்பட்டுள்ளது. நன்றி தினமணி.
வலையேற்றியது – ஜெயபாலன்

பிகு:

வடுவூர் பறவைகள் சரணாலயம் பற்றிய ஒரு வலைப்பதிவு

வடூவூர் பறவைகள் சரணாலயம் பற்றிய தமிழ்நாடு வனத்துறையின் வலைப்பக்கம்

Like and Share

இயந்திரமயமாகிய விவசாயம்

ழைமையிலிருந்து புதுமைக்கு மாறும்போது பிரச்னைகள் எழுவது வழக்கமான விஷயம்தான். இந்த பிரச்ன்னை வேளாண்மைத் துறையில் மாற்றம் ஏற்படும்போது எழுவதுண்டு. ஏர்-கலப்பை, உழவு மாடு போன்ற இயற்கையோடு தொடர்புடையதாக இருந்த வேளாண்மைத் தொழில் தற்போது கொஞ்சமாக இயந்திரமயமாகிக் கொண்டிருக்கிறது.

கடந்த  1960-களில் நிலத்தை உழுவதற்கு டிராக்டர் பயன்பாடு பரவலாகப் பிரபலமடைந்தது.
இதனால்,மனித ஆற்றலின் தேவை குறைந்தது.இதன் விளைவாக வேலையிழப்பும் ஏற்பட்டது.இதேபோல,காளைகளின் தேவை குறையத் தொடங்கியது. எனவே, டிராக்டர்களின் அறிமுகம் காளைகளின் அழிவு என்றெல்லாம் கூறப்பட்டது
தொழிலாளர்கள் மத்தியிலும் டிராக்டர் பயன்பாட்டுக்கு எதிர்ப்பு எழுந்தது. கிராமத்துக்குள் டிராக்டர் வரக் கூடாது என்றெல்லாம் அக்காலத்தில் தொழிலாளர்கள் தடை விதித்து. போராட்டங்களும் நடத்தினர். மீறி வந்த டிராக்டர்கள் சில கொளுத்தப்பட்டன. டயர்கள் கழற்றி எறியப்பட்டன. டிராக்டருக்கு பாதுகாப்பு போடும் நிலைமைகூட அப்போது இருந்தது. இப்படியெல்லாம், கடும் எதிர்ப்பு நிலவி வந்தாலும், காலப்போக்கில் அதன் வீரியம் குறைந்து விட்டது. கிராமங்களில் டிராக்டர்களின் எண்ணிக்கை அதிகரித்தது. கடந்த 1980-களில் நம் நாட்டில் டிராக்டர்களின் எண்ணிக்கை 6.60 லட்சம் இருந்ததாகப்புள்ளி விவரங்கள் தெரிவித்தன. இன்று, கிராமத்துக்கு குறைந்தது 15 டிராக்டர்களாவது இருக்கன்றன.
பவர் டில்லர்
ஆனால், சிறு பரப்பளவு கொண்ட விளைநிலத்தில் டிராக்டரை பயன்படுத்துவது பிரச்னையாக இருந்து வந்தது இந்நிலையில், 1990-களில் சிறு பரப்பளவு கொண்ட விளைநிலத்தையும் உழுவதற்கேற்ற’பவர் டில்லர்’ இயந்திரமும் அறிமுகம் செய்யப்பட்டது. கடந்த 10 ஆண்டுகளுக்கு முன்பு, கதிரடிக்கும் இயந்திரமும் விவசாயிகள் மத்தியில் பிரபலமடைந்து தற்போது, பரவலாகப் பயன்படுத்தப்பட்டு வருகிறது
அறுவடை இயந்திரம்
இந்த நிலையில் 2000 ஆம் ஆண்டுக்குப் பிறகு வறட்சி, வெள்ளம் காரணமாக விவசாயக் கூலித் தொழிலாளர்கள் மத்தியில் வேலையில்லாத் திண்டாட்டம் அதிகரித்தது.
குறிப்பாக தமிழகத்தின் நெல்களஞ்சியமான ஒருங்கிணைந்த தஞ்சை மாவட்டத்தில் இந்த பிரச்னை மேலோங்கிக் காணப்பட்டது.
இதனால், தொழிலாளர்கள் பலர் கிராமங்களிலிருந்து பிழைப்புத் தேடி வெளி மாவட்டங்களுக்கும், வெளி மாநிலங்களூக்கும் இடம் பெயர்ந்தனர். எனவே, கூலித் தொழிலாளர்கள் பற்றாக்குறை பெரும் பிரச்னையாகிவிட்டது.
நடவு, அறுவடை உள்ளிட்ட பல்வேறு பணிகளும் பாதிக்கப்பட்டன. இதனால், உற்பத்தி இழப்பும் ஏற்பட்டது. எனவே, நடவுப் பணி, அறுவடை போன்றவற்றுக்கும் இயந்திரம் அவசியமாகிவிட்டது. இந்நிலையில், கடந்த4 ஆண்டுகளுக்கு முன்பு, அறுவடை இயந்திரம் அறிமுகம் செய்யப்பட்டது. இந்த இயந்திரம் பயன்பாட்டுக்கு வந்தபோதும், தொழிலாளர்கள் மத்தியில் கடும் எதிர்ப்பு நிலவியது. ஆனால் ஆள் பற்றாக்குறை பெரும் பிரச்னையாகிவிட்டது, கடந்த சில ஆண்டுகளாக இந்த இயந்திரத்தின் பயன்பாடு பரவலாகிவிட்டது. ஒரு மணி நேரத்துக்கு ஒரு ஹெக்டேரில் அறுவடை செய்துவிடும் இந்த இயந்திரத்தில் கதிரும் அடிக்கப்பட்டு விடுவதால், நேரடியாக லாரியில் ஏற்றும் அளவுக்கு வேலைகள் மிச்சப்படுகின்றன.
நாற்று நடவு இயந்திரம்
தற்போது நாற்று நடவுக்கும் ‘பவர் டில்ல்ர்’ வடிவிலான இயந்திரமும் அறிமுகம் செய்யப்பட்டுள்ளது. ஒரு மணி நேரத்தில் 2 ஹெக்டேரில் நடவு செய்யும் இந்த இயந்திரம் இன்னும் பரவலாக நடைமுறைக்கு வரவில்லை.  இதேபொல், கரும்பு வெட்டுவதற்கும், தென்னை மரத்தில் தேங்காய் பறிப்பதற்கும் இயந்திரம் அறிமுகம் செய்யப்பட்டாலும், இன்னும்  விவசாயிகள் பயன்பாட்டுக்கு வரவில்லை. இயந்திரங்கள் பரவலாக வந்துவிட்டாலும், அதிலும் பல பிரச்னைகள்   உள்ளன. நிலத்தில் ஆள் நடந்தாலே அந்த இடத்தில் புல் செடிகள்கூட முளைக்காது. இந்நிலையில், டிராக்டரை இயக்குவதால், நிலம் கெட்டியாவது, மழை பெய்தால் மேல்மண் தண்ணிரில் அடித்துச் செல்வது, மண் புழுக்கள் உள்ளிட்ட நுண்ணுயிர்கள் மடிவது போன்ற பிரச்னைகளும் உள்ளன.
இதேபோல,அறுவடை இயந்திரத்திலும் உள்ளது. இதில் வைக்கொல் சுக்குநூறாக துண்டாகிவிடுவதால், மாட்டுத் தீவனத்துக்குப் பயன்படுத்த முடியாமல் போய்விடுகிறது. நம் நாட்டில் அரை ஏக்கர், கால் ஏக்கர் மற்றும் அதற்குக் குறைவான பரப்பளவு கொண்ட நிலங்களை வைத்திருக்கும் சிறு, குறு விவசாயிகள் ஏராளம். எனவே, மிகப் பெரிய வடிவம் கொண்ட அறுவடை இயந்திரம் குரைந்தபட்சம் 10,20 ஏக்கர் வைத்திருக்கும் விவசாயிகளுக்குத்தான் பயனுள்ளதாக இருக்கிறது. உள்ளடங்கிய பகுதியில் உள்ள நிலங்களுக்கு இந்த இயந்திரம் கொண்டு செல்வதற்கான பாதையும் பெரும்பாலான இடங்களில் கிடையாது. எனவே, இது போன்ற் இடங்களில் இந்த இயந்திரத்தைக் கொண்டு செல்வதில் சிரமம் நிலவுகிறது.
நாற்று நடவு செய்யும் இயந்திரம் அறிமுகம் செய்யப்பட்டுருந்தாலும், இன்னும் விவசாயிகள் பரவலாகப் பயன்படுத்தும் அளவுக்கு வரவில்லை. மேலும், இதன் விலையும் அதிகமாக இருப்பதால், சிறு,குறு விவசாயிகளுக்கு எட்டாக் கனியாகவே உள்ளது. எனவெ, தொழில்நுட்பங்கள் மேம்பாடு அடைந்திருத்தாலும், ஏர் கலப்பையும், உழவு மாடும் போல வருமா? என்ற ஏக்கம் இன்னும்கூட விவசாயிகள் மத்தியில் நிலவுகிறது.


பின் குறிப்பு: தினமணி புத்தாண்டு மலர் திருச்சி பதிப்பில் வந்த இந்த கட்டுரை இணையத்தில் எங்கும் கிடைக்கவில்லை. இதன் பயன் கருதி இங்கு மீள்பதிப்பு செய்யப்பட்டுள்ளது. நன்றி தினமணி.

வலையேற்றியது – ஜெயபாலன்

Like and Share

கண்களைக் கொள்ளை கொள்ளும் அலையாத்திக் காடுகள்

திருவாரூர் மாவட்டம் , முத்துப்பேட்டை சதுப்பு நிலப் பகுதியில் (லகூன்) அமைந்துள்ள அலையாத்திக் காடுகள் சுற்றுலாப் பயணிகளின் கண்களைக் கவரும் வகையில் சிறப்புற அமைந்துள்ளது.

இந்தக் காடுகள் சுமார் 120 சதுர கிலோ மீட்டர் அளவுக்குப் பரந்து விரிந்துள்ளன.  எங்கு பார்த்தாலும் தண்ணிரும், திட்டு திட்டாக காடுகளும் அமைந்துள்ளது காண்பவரின் கண்களைக் கொள்ளை கொள்ளும்.

இந்தச் சதுப்பு நிலக் காடுகளில் அலையாத்தி எனப்படும் மரம் 95சதவீதம் உள்ளது.மேலும் தண்டல், தில்லை, நரிக்கந்தல், நீர்முள்ளி உள்ளிட்ட பலவகை மரங்களும் உள்ளன.

இந்தப் பகுதியில் 73 வகையான மீன்களும்,6 வகையான இறால்களும் வாழ்கின்றனவாம்.இந்தச் சதுப்பு நிலக் காடுகளைச் சார்ந்து சுமார் 3,000 குடும்பங்கள் வாழ்ந்து வருகின்றன.

கடலில் முட்டையிட்டு குஞ்சு பொறிக்கும் மீன்கள் இனப்பெருக்கக் காலத்திலிந்த அலையாத்திக் காடுகளுக்கு வந்து தங்கி இங்கு மரங்களிலிருந்து விழும் இலைகள் உள்ளிட்டவற்றை உண்டு நன்கு வளர்ந்து மிண்டும் கடலுக்குச் செல்கின்றன.
நசுவினி ஆறு, பட்டுவான்ஜி  ஆறு, பாமணி ஆறு, கோரையாறு, கண்டன்குறிச்சி ஆறு, மரைக்கா கோரையாறு, கீழத்தஞ்சை ஆறு உள்ளிட்ட ஆறுகள் இந்தச் சதுப்புனிலப் பகுதியில்(லகூன்) கலந்து அதன் பின்னர்தான் கடலில் கலக்கின்றன.
முத்துப்பேட்டை ஜாம்புவானோடை பகுதியிலிறுந்து மோட்டார் படகில் சென்றால் சுமார் ஒரு மணி நேரத்தில் ’ தலைமை முனை’ என்னும் இடத்தை அடையலாம்.
இங்கு அலையாத்திக் காடுகளின் உள்ளே சென்று சுற்றுலாப் பயணிகள் பார்வையிடும் வகையில் 162 மீட்டர் நீளத்துக்கு மரத்தாலான நடைபாதை அமைக்கப்பட்டுள்ளது. இது போன்று இந்தியாவில் வேறு எங்கும் அமைக்கப்படவில்லை.
ஆஸ்திரேலியா, மலேசியா,பிலிப்பின்ஸ் ஆகிய நாடுகளில்தான் இது போன்ற நடைபாதை அமைக்கப்பட்டுள்ளதாம். இங்கு சுற்றுலாப் பயணிகள் ஒய்வெடுக்கும் வகையில் ஒய்விடமும் அமைக்கப்பட்டுள்ளது.
நவம்பர், டிசம்பர், ஜனவரி மாதங்களில் சைபீரியா, ரஷியா, ஈரான், ஐரோப்பி நாடுகளிலிருந்து சுமார் 80 வகையான பறவைகள் இங்கு வருகின்றன. இவற்றில் பூநாரை, சாம்பல்நாரை, வண்ணநாரை, பாம்புத்தாரா, கரண்டிமூக்கன் உள்ளீட்ட பல்வேறு அரிய வகை பறவைகளும் அடங்கும்.
தற்போது அலையாத்திக் காடுகளைப் பார்க்கவரும் சுற்றுலாப் பயணிகள் முத்துப்பேட்டை வந்து, அங்குள்ள வனத் துறை அலுவலகத்தில் அனுமதி பெற்றுக் கொண்டு, மீன்பிடிக்கப் பயன்படுத்தப்படும் மோட்டார் படகுகளில் சென்று அழகு கொஞ்சும் அலையாத்திக் காடுகளை சுற்றிப் பார்க்கலாம். கடலூர் மாவட்டம், பிச்சாவரத்தில் உள்ள அலையாத்திக் காடுகளைவிட சுமார் 4 மடங்கு அளவில் பெரிதாக இந்த முத்துப்பேட்டை காடுகள் பரந்து விரிந்துள்ளன.

இயற்கை நமக்குத் தந்த பாதுகாப்பு  அரணை, இயற்கை எழில் கொஞ்சும் அந்தப் பசுமையைப் பார்த்து ரசித்துக் கொண்டே இருக்கலாம்.

பின் குறிப்பு: தினமணி புத்தாண்டு மலர் திருச்சி பதிப்பில் வந்த இந்த கட்டுரை இணையத்தில் எங்கும் கிடைக்கவில்லை. இதன் பயன் கருதி இங்கு மீள்பதிப்பு செய்யப்பட்டுள்ளது. நன்றி தினமணி.

Like and Share

நெருஞ்சிற்காடு-கதைக்களம்

ஆசிரியரின் உரை:

உலகின் முதலனு தமிழன்,முதுமொழி தமிழ் என்னும் பெரும் பேற்றினை ஏற்று அறம் ,பொருள் இன்பம் என்னும் சீரிய பண்பாட்டினை கருவாக கொண்டு திராவிட பாரம்பரியத்தை உருவாக்கி ,நிறைவு பெற்று நிலைத்து நின்ற நாடு நம்நாடு ! இன்றோ அது காலவெள்ளத்தால் மூழ்கடிக்கப்பட்டு நெருஞ்சிற்காடு போன்று காட்சியளிக்கிறது .பட்ட இடமெல்லாம் குத்துகிறது .

இதனுள் சாதி ,சமயம்,கொள்கை,குழுமம் எனும் கொழுகொம்பு கொண்டு ,பருவ இயல்புக் கேற்ப உள்ளத்தினை உந்தவிடுத்து வாழும் மக்கள் வெள்ளம் நிரம்பி வழிகின்றது .ஆங்கே ;இதற்கிடையில் தானே நாமும் வாழ்கிறோம் என்றெண்ணி அழுங்கி அழுங்கிச் சாகும் நல்லுள்ளங்களும் காண்கிறோம் ! நாடு திருந்தும் எனதற்கோ வழிஇல்லை .

எனினும் காட்டாற்று வெள்ளத்தினை அங்கையால் தடுக்க முயல்வது போன்று தன்னால் முடிந்தவரை செய்வோமே என்று முயலும் அறிவுசால் நல் உள்ளங்களையும் ஆங்காங்கு காண்கின்றோம் .அவ்வுள்ளங்களின் பின்னே அடியெடுத்துவைத்து பீடுநடைபோட எண்ணியே இந்த நூலை வடித்து தங்கள் முன் வைக்கிறேன் .

இந்த நூலானது முழுதும் கற்பனை வடிவம் கொண்டது ! கருத்துகளே என் உள்ளபாங்கு ! அறிவுலகம் இதை ஏற்கும் என்ற உணர்வோடு எழுதிஉள்ளேன் .

கதைக்களம்:

இந்த நூலை பொருத்தவரை பொருந்தா திருமணத்தால் எழும் இன்னல்களை அழகாக படம் போட்டு காட்டுகிறார் .கதையில் முக்கிய கதாபத்திரம்மருதைதனது முதல் மகள்பூங்கொடிக்குநாகசுந்தரம்என்பவனை திருமணம் செய்து வைக்கிறார் .அவனது குடும்பமோ பண்பாடில்லாத குடும்பமாக இருக்கிறது .இதனால் எழும் இன்னல்களையும் ,நிம்மதி அற்ற சூழ்நிலைகளையும் தனக்கே உரிய பாணியில் கவிதையோடு கலந்து இயற்றி உள்ளார் .

ஒருகட்டத்தில் அதே குடும்பத்தில் இருந்து தனது மகனுக்கு பெண் எடுக்கும் சூழ்நிலைக்கு தள்ளப்படுகிறார் .மருமகளும் பண்பாடில்லாத பெண்ணாக இருப்பதால் மருதை அவல நிலைக்கு ஆளாகிறார் .மகனும் முழுநேர குடிகாரனாக மாறிவிடுகிறான் .இந்நிலையில் தனது இரண்டாவது மகனுக்குஅவன் விரும்பிய இடத்தில் மணமுடிக்கிறார் .அதுவும் சரிஇல்லாமல்போகவே மிகவும் மனமுடைகிறார் .

தனது மற்றுமொரு மகள் திருமணம் ஆகாமல் இருபது வேறு அவரை வாட்டுகிறது .இந்நிலையில்தென்னன்என்பவனை எதார்த்தமாக சந்திக்கிறார் .ஒருமுறை அவர் வழுக்கி விழும்போது அவன் இவரை காப்பாற்றுகிறான்.அதன் நட்பாகி கதையின் இறுதியில் அவனையே தனது மகளுக்கு திருமணமும் செய்து வைக்கிறார் .

இதற்கிடையில் முதல் மகள் வரதட்சனை கொடுமையால் பிறந்த வீடு திரும்புகிறாள் . அவளது கணவன்(நாகசுந்தரம்) பொறுப்பில்லாமல் சுற்றி திரிந்து விட்டு இறுதியில் மனைவியை கொலை செய்ய நண்பனுடன் திட்டம் தீட்டுகிறான்.ஆனால் வந்த இடத்தில் பாம்பு கடித்து இறக்கிறான் .ஆனால் அவனுடைய நண்பன் பூங்கொடியை கொலை செய்து விட்டு சென்று விடுகிறான் .மகளை இழந்த மருதை அழுது புலம்புகிறார் .இப்படி செல்கிறது கதை .கதையில் ஆங்காங்கே திராவிட கொள்கைகளின் தாக்கம் தென்படுகிறது.

சுவாமி ஐயப்பனையும்,அய்யனாரையும் ஒன்று என்று கூற விழைகிறார் .சில மூட நம்பிக்கைகளாலும் ,பழக்க வழக்கமும் மனிதனை எந்த அளவுக்கு வேதனையடைய செய்கின்றன என்பதை கதையில் வரும் சில கதாபத்திரங்களின் மூலம் கண் முன்னே கொண்டு வந்துள்ளார்.அதுமட்டுமில்லாமல் ,உழவர்கள் படும் துன்பத்தை மருதை மூலம் கூறி இருக்கிறார் .பல நாள் போராடி உழைத்து பயிர் செய்யும் ஒருவனை விட அதை வாங்கி விற்கும் ஒருவன் அதிகமாக சம்பாதிக்கிறான் ,உழைப்பவன் பெறுவது சொற்பமே என்பதை தனது கவிதை மூலம் தெரிய படுத்துகிறார் .இது என்னவோ தற்போதும் நடந்து வருவது நாம் அனைவரும் அறிந்ததே .

பண்பாடில்லாத குடும்பத்தை நெருஞ்சிர்காடு என்று கூறுகிறார் .நெருஞ்சில் பார்ப்பதற்கு நன்றாக இருக்கும் ,ஆனால்,அதன் மீது அடி வைத்தால் குத்தி குருதி பார்த்து விடும் ,அதுபோல பணத்தை கண்டு பண்பாட்டை மறந்து பெண் எடுத்தாலும் ,கொடுத்தாலும் வாழ்கையில் நிம்மதி போய்விடும் என்பதை கதையின் கருவாக கொண்டுள்ளார்.நமது புலவரின் இந்த நூலானது ஒரு சமுதாய முன்னேற்றத்திற்கான முதல் படி என்று கூட சொல்லலாம் .ஒரு குடும்பம் எப்படி இருக்ககூடாது என்பதற்கு உதாரணம் இவரது மருதையின் குடும்பம் என்று கூட சொல்லலாம் .கவிஞர் பாரதிதாசனும் தன்னுடையஇருண்ட வீடுஎனும் நூலில் இதே கருத்தை கூறி உள்ளார் என்பது சிறப்பு .

மீண்டும் புலவரின் மற்றுமொரு நூலானமுதுமொழிப்பாவைஎனும் நூல் பற்றிய சிறு குறிப்போடு சந்திப்போம் …….

Like and Share

நெருஞ்சிற்காடு-அணிந்துரை

நமது புலவர் திரு.க.விசுவலிங்கம் அவர்கள் இயற்றிய “ நெருஞ்சிற்காடு”  எண்ணும் இந்நூலில் மொத்தம் 14  கதைபாத்திரங்களை பயன்படுத்தியுள்ளார்.அவற்றின் பெயர்கள் கீழ்கண்டவாறு விவரிக்கபட்டுள்ளன.

1.மருதை நாயகம் :கிழவன்,பூங்கொடியின் தந்தை.

2.நன்னன்:மருதை நாயகத்தின் முதல் மகன்,நாகவல்லி கணவன்.

3.மணிமொழி :மருதை நாயகத்தின் இரண்டாவது மகன்.

4.தென்னன்:தேன்மொழியின் காதல் நண்பன்.

5.பூங்கொடி:மருதை நாயகம் மகள்,நாகசுந்தரம் மனைவி.

6.தேன்மொழி:மருதை நாயகம் இரண்லாவது மகள்

7.நாகசுந்தரம்:பூங்கொடி கணவன்

8.நாகவல்லி:நன்னன் மனைவி,மருதை நாயகம் முதல் மருமகள்.

9.முருகன்:பணியாளன்.

10.அமுதாள்:முருகன் மனைவி.

11.நாரணன்:கோயிற் பணியாளன்.

12.விரலிகூத்தன்:நாகசுந்தரம் நண்பன்.

13.செல்வநாயகம்:தென்னனின் நண்பன்.

14.சுயம்பு: தென்னன் நண்பன்.

மற்றும் உழவர்கள்,நடுநிலையாளர்கள்.

இக்கதை 5 களங்களாகவும்,3 அங்கமாகவும் இயற்றப்படுள்ளது.ஒவ்வொரு அங்கமும் எந்த இடத்தில்,எப்பொழுது (இடம்,நேரம்) நடைபெறுகிறது என்றும் கூறப்பட்டுள்ளது.

இந்நூலிற்கு அணிந்துரை அளித்துள்ள மதுரை காமராசர் பல்கலைக்கழக முன்னாள் தமிழ் துறைத்தலைவர் முனைவர் திரு.தமிழண்ணல் அவர்களுடைய கருத்து:

பொருந்தா மணத்தால் பூங்கொடி-மருதைநாயகம் மகள் நெருஞ்சிற்காடினுள் அகப்பட்டு தவித்து தன் கணவன் நாகசுந்தரமும் அழியத் தானும் அழிய நேர்கிறது.இவ் அவல நாடகம் சூழ்நிலையான் மாந்தன் கெட்டழிவான் என்பதை கருவாகக் கொண்டு இயங்குகிறது.”சில்லென்று பூத்த சிறுநெருஞ்சிக் காட்டினுள்ளே நில்லென்று கூறி நிறுத்தி வழி போனீரே” என்ற நாட்டுபுறப்பாடல் கணவனை இழந்த காரிகையின் கதறலாகும்.இங்கு பூங்கொடி தானும் மாய்ந்து,அவலத்தின் உச்சியை அடையக் காண்கிறோம்.

தாமாக கற்று தமிழில் கவிபாடும் க.விசுவலிங்கம் புனைந்துள்ள ”நெருஞ்சிற்காடு” என்ற இக் கவிதை நாடகம் ஒரு நாட்டுப்புறப் பாடல்போலவே,இனிதாய் எளிதாய் ‘சிந்து பாடும் சிற்றருவி’ என நடைபயில்கிறது.அறிஞர் அண்ணவால் தகுதிச் சான்று வழங்கப்பெற்ற இவ்வியற்கை கவிஞர் நல்ல பல தன் அனுபவ மொழிகளின் தொகுப்பாகவே இந்நூலை யாத்துள்ளார்.கதையை காட்டிலும் கருத்தில் மிகுந்த அக்கறை செலுத்தும் இந் நடகத்தில் நமது அன்றாட வாழ்விற்கான நடைமுறை-பட்டறிவு விளக்கங்களை நூல் முழுவதும் காண்கிறோம்.

பண்பா டில்லா இனத்தினுள் பெண்ணைத்

திருமணம் செய்து கொடுத்தலும் கொடுத்துத்

திரும்ப பெண்ணை பெறுதலும் முறையாய்க்

காக்கும் தகுதி இல்லா ஒருவனைக்

கணவன் என்ன ஏற்றே அவனுடன்

நிலைத்து வாழ நிற்றலும் பிறரை

ஒழுங்கு படுத்த ஒவ்வாச் சூழலில்

பெண்ணைக் கொடுத்து வாழ விடுத்தலும்

என்றும் தீங்கு பயப்பதாம்.

சூழல் மாந்தனைக் கெடுக்கும்;அதனால் பொருந்தாமணமும் நெருஞ்சிற்காட்டினுள் அகப்பட்ட நிலைமையையே உண்டாக்கும்.இதுதான் இந்நூல் தரும் உயிரான கருத்து.

மனித வாழ்வில் எத்தனை சடங்குகள்;எத்தனை வீண் செலவுகள்!”பிறந்த நாள் தொட்டே இறக்கும் வரைக்கும் எண்ணிப் பலப்பல தெளியாச் சடங்குகள்”!வாழ்க்கையை ஒருமுறை வறளவிட்டுவிட்டால் அதை திரும்ப பெறுவது மிகமிகக் கடினமே!”எத்தகு முயற்சி செய்யினும்  …வாழ்வைத் திரும்பப் பெறுவதென்பதோ எளிதென எண்ணற்கில்லை”

உணவு போன்றவற்றை உண்டாக்குபவன் ஒரு பங்கு பெற்றால்,அதை வாங்கிவிற்க்கும் வணிகன் பத்துப்பங்கு பெறுகிறான்.இக் கொடுமை இன்றும் நிகழ்கிற்து.

இட்டலி அம்பது காசு!அதையே தோசையாக்கினால் இரண்டரை ரூபாய்! அம்மட்டோ!

………….அதனையே

கொஞ்சம் அழுத்தித் தேய்ப்பின் அதன்விலை

மூன்றரை ரூபாய் என்பான்! அதனையே

மேலும் அழுத்தித் தேய்ப்பின் அதன்விலை

நான்கரை ரூபாய் என்பான்! இடையினில் தண்ணீர் ஊற்றித் துடைப்பதைத் தவிர

வேறென் மாற்றம் செய்தனன்!”

இவ்வாறு நகைச்சுவை பெற நாட்டுநடப்பைக்

காட்டுமிடங்கள் இதிற்பலவுள!”சூழ்நிலை வருத்த நேரின் எவனுமே நிலைத்து நிற்க இயலாது”என்பது இவர்தம் அறிவுரை!

பெற்றோர் அணைப்பில் அன்றிப் பிறிதொரு

பிணைப்பில் வாழும் பிள்ளைகள் எதுவும்

தேறி வருதல் இல்லை!

முன்னேறிய நாடுகள் எல்லாம் படும் அல்லல் இது.

இப்பகுதி முழுவதும் பெற்றோர் படிப்பது நல்லது.

சமயச் சார்பின்றி வளர்ந்த் தமிழினம்,இன்று புறச்ச்மயச் சார்புகளால் தள்ளாடுவதையும் பண்பாடு சிதைவதையும் நன்கு சுட்டிக்காட்டுகிறார்.தென்னையின் ஆக்கும் இயல்பையும் மூங்கிலின் அழிக்கும் தன்மையையும் ஆக்கும் இயல்பையும் மூங்கிலின் அழிக்கும் தன்மையையும் இவர் குறிப்பிடுவது,இவர்தம் இயற்கை பற்றிய நுண்ணரிவை விள்க்குகிறது.தமிழன் நான்குமொழிகள் கற்கும் கட்டாயத்திலுள்ளான்.தாய்மொழி,சமயமொழி,தெசியமொழி,உலகமொழி என எம் மொழி கற்பினும் “ஒழுக்க உணர்வை ஊட்டும் தமிழ்மொழி ஒதுக்கபட்டு நிற்பதால் உலகில் ஒழுக்க உணர்வோ குன்றுதும்”என்று வருந்திக்கூறுகிறார்.

உலகில்உயிர் அணுஎதுவும் தோன்றாமுன் தோன்றிஒலி

உணர்வாய் நின்று

உலவிஉரு வடிவாகி உயிராகி மெய்யாகி

உயிர்மெய் யாகி

நிலவுமெழில் வடிவாகி நின்றுலவும் தமிழணங்கே!

எனும் இவரது தமிழ்ப்பற்று போற்றுத்ற்குரியதாகும் என புலவரின் தமிழ்ப்பணி மேலும் வளர வாழ்த்துகிறார்.

Like and Share